(( مظلوم ))
مظلوم .. و اللي ظلمني الله حسيبه
على نيتي ما حسبت حساب المكايد
خذلني الزمان و ما قويت تكذيبه
صدمتي كانت قويه من أحباب و سنايد
ما هقيت إن القريب يطعن قريبه
طعنة فوق الوجع قهرها كايد
و لا صار أخوك يغشك هذي مصيبه
خلاص ما بقى لك عضيد وقت الشدايد
أجل لا خانوا الأحباب ما هي غريبه
في زمان غدى فيه الكذب حيل زايد
و الإخلاص لو زاد صار شك و ريبه
و ما احد يمد يديه من غير عايد
حتى المشاعر اليوم صارت نهيبه
تزرع وفا وغيرك يجني فوايد
لكن أنا ما أخذت من الزمن غير طيبه
اعتبرني شخص من زمان الوفا البايد
وهبتك قلبي عطية و تهنى بتعذيبه
تراني ما ارجع في عطيتي و لاني حايد
أنا كلي فخر بقلب ما يعبه إلا طيبه
و أتوسم شرف طيبتي لو جروحي قلايد
ما تغيرني رداة أيام عسرة و عصيبه
و ما يغلبني جيش الحزن لو الهم قايد
الأربعاء أبريل 21, 2010 7:50 am
